À la une

An kreyòl- Rezime: Rezime aktyalite semèn nan sòti dimanch 6 Jen pou rive Samdi 12 Jen 2021 an.

image

ExodeNews ap envite w swiv rezime tout aktyalite ki te pase pandan semèn nan, san retire san mete.

Soti dimanch 6 Pou rive samdi 12 Jen an.

Aprè atak bandi ak zam te fè sou komisarya Divivye, Douya, Syera2 ak Stasyon Gonayiv, jou dimanch kite 6 jen 2021 an, responsab Jiridiksyon Polis Site Solèy la te voye yon rapò bay Direktè Depatmantal Lwès 2 a kote li fè konnen, bandi ak zam yo pote ale 13 Fizi 12, 2 galil, yon T65 ak plizyè radio kominikasyon, Toujou daprè bilan an, nan menm atak sa yo, polisye Luc Fedlin te blese ak bal epi responsab antènn Douya a kise Enspektè Divizyonè Myradel ADOLPHE te rive pèdi lavil.

Aprè 2 semènn kote Direktè Jeneral ONA a te mouri nan maladi Covid-19 la, jou lendi kite 7 jen 2021 an, yon komisyon ki genyen 3 manb te enstale nan tèt enstitisyon sa. Manb komisyon sa kise M. Ronald BAZILE, M. Jamesley Jean-Baptiste ak Mme Eunide ALABRÉ gen misyon pou jere enstitisyon sa daprè tout nòm ak prensip yo.

Nan menm jounen lendi sa, Stòp Aksidan fè konnen nan yon bilan, ki sòti nan dat 31 me pou rive 6 jen 2021 an, genyen yon total 24 aksidan sikilasyon ki te fèt nan zòn : Sen-lwi- nò, Plèn Nò, Bomon, Ti Gwav, Petyon vil, Pòdepè, Matisan ak ak Bwa Vèna.
Toujou daprè responsab òganizasyon an kise Doktè Garnel Michel, nan 24 aksidan sikilasyon sa yo te genyen 11 moun kite mouri ak 79 kite blese.

Aprè Lopital Sen Lik ak Lopital kanape vè ki gen inite pou responsab moun ki gen maladi kowona viris la kite deja anonse yo pa gen plas pou pran malad ankò, jou kite madi 8 jen an, se lopital Advantis Dikini kite anonse yo paka resevwa moun ankò akòz wout matisan an ki bloke yo paka jwenn ekipman pou yo fonksyone.

Malgre anpil lopital nan peyi a kap anonse yo pa gen plas pou resevwa moun ki gen kowona viris la, men moun pa janm sispann mouri nan maladi sa, nan jounen madi 8 jen an, se te Monseyè Ducange Sylvain kise Evèk Oksilyè Pòtoprens depi nan lane 2016, ki te rive pèdi lavil aprè kèk jou li te pase nan lopital mibalè a.

Toujou nan menm jounen madi sa, anplwaye Meri Laskawobas yo te deside fèmen tout pòt meri a, nan objektif pou fè Leta peye yo 18 mwa travay, daprè anplwaye yo, aksyon sa se youn nan plizyè faz mouvman an si tout fwa Leta santral pa tande kri yo.

Nan yon arete Prezidansyèl kite pibliye mèkredi 9 jen an, Prezidan repiblik la Jovenel Moise te nonmen Jemsley Marc Jean-Baptiste kòm nouvo direktè ONA. Mesye Jean-Baptiste ranplase nan pòs sa, Me Chesnel Pierre kite mouri nan maladi kowonaviris.

Nan menm jounen mèkredi sa, Kòdonatè Pati Politik Fizyon an kise Rosemond Pradel, ansyen senatè grandans la, Sorèl Yacinth akonpanye avèk kòdonatè Nasyonal Pati Politik Ayiti An Aksyon an, Youri La Tortue te chita pale sou ansanm kriz kap sakaje peyi a. Ansyen Senatè Latibonit la te pwofite voye senpati l bay popilasyon Matisan an ak Fontamara, kap pase yon moman trè difisil.

Alexandre Pierre Paul, anpil moun konnen sou non Canal du Vent, te tonbe anba bal moun yo pa rive idantifye jou kite jedi 10 jen 2021 an, sitwayen sa te toujou genyen plizyè zam ilegal nan men l ak yon Epe.

Byen bonè maten vandredi kite 11 jen an, Watson Joseph ki tap fè tèt li pase pou polisye ak inifòm UDMO, te rive jwenn arestasyon li gras ak vijilans yon vrè polisye kite an sivil nan zòn Wanament.

Nan objektif pou selebre 26 lane egzistans fòs Polis Nasyonal la, jou kite samdi 12 jen 2021 an, Responsab PNH yo te òganize yon jounen refleksyon sou tèm .Yon Polis an amoni kap bay popilasyon li bon jan sèvis. Direktè Jeneral Polis la, Léon Charles, fè konnen li renouvle angajman li pou l batay kont Ensekirite ak Kriminalite sou tout 10 depatman peyi a.

ExodeNews la pou Enfòme w !

image

PETIT FRÈRE Jean Rony Poito

Rédacteur

Laisser un commentaire





aucun commentaire pour l'instant